Ginpakigbahin ni Coach Julius Naranjo nga nagtanyag siya kay Olympic gold medalist Hidilyn Diaz nga magpirma sang prenuptial agreement.
Ini bangud suno kay Naranjo nga amo man ang coach-trainer ni Diaz, gusto niya pamatud-an nga indi kuwarta ukon materyal ang iya nga lagas kundi matuod-tuod nga pagpalangga.
Sa bahin ni Diaz, ginpakigbahin sini nga mas na-apresyar niya ang ginhimo sang iya mangin bana. “Yes, of course. Napatunayan [niyang] mahal [niya] ako. Para sa akin kasi it’s just a piece of paper and what’s important is us,” suno sa Olympian.
Gin-ako man sang duha nga plano na nila nga mag-angkon sang mga anak, apang magapasakop pa si Diaz sa 2024 Summer Olympics.
Oktubre 2021 sang gin-anunsyo ang engagement sang duha. Buwas, Hulyo 26, ang ila nga kasal sa Baguio City, anibersaryo ang maragtason nga pagdaog ni Diaz sang gold medal sa weightlifting sa Tokyo Olympics — ang labing-una nga bulawan nga medalya sang Pilipinas sa Olympiada. ##
