Naghimo sang panibag-o nga maragtas si EJ Obiena bilang labing-una nga Pinoy nga nakakuha sang medalya gikan sa World Athletics Championships.
Nadala pauli ni Obiena ang bronze medal matapos gin-reset ang Asian record kag ang iya nga personal best paagi sa 5.94-meter clearance sa world championship stage sa Hayward Field sa Eugene, Oregon, United States.
Matandaan nga ang previous personal record ni Obiena ang yara sa 5.93 meters nga amo man ang previous Asian record.
Nagtinguha pa si EJ nga ma-clear ang 6.00 meters apang napaslawan sa tatlo niya ka attempts.
Ang world record holder nga si Mondo Duplantis sang Sweden ang nakakuha sang gold samtang si Chris Nilsen naman sang Estados Unidos ang nakakuha sa silver.
Todo ang performance ni EJ subong nga tuig bangud anum na ka mga gold medals ang iya natipon. Antes ang worlds, bag-o lang gid nakuha sang 26-anyos nga Pinoy vaulter ang bulawan nga medalya sa Jump and Fly meet sa Germany. ##
