ILOILO CITY – Gin-raid sang pulis sa Japan ang balay sang isa ka board member sang 2020 Tokyo Olympics nga ginapahayag nga nagbaton sang kwarta nagikan sa mga sponsor nga nagpirma sang kontrata.
Suno sa report, ginsuspetsahan si Haruyuki Takahashi, 78, nga nagbaton sang linibo ka dolyar nagikan sa high street business suit retailer nga Aoki Holdings Inc. nga amo ang nangin official partner sang mega event sang nagligad nga tuig.
Ginakabig ini nga bribery bangud si Takahashi ang isa ka quasi-civil servant nga indi mahimo nga magbaton sang ano man nga kwarta kag regalo may kaangtanan sa iya position.
Tikom naman ang bibig sang Tokyo prosecutors’ office.
Ang sports consulting firm nga ginapadalagan ni Takahashi ang ginasuspetsahan nga nagbaton sang kwarta nagikan sa Aoki sa isa ka kontrata nga ginpirmahan sang 2017.
Ang Aoki ang nangin Tokyo Games sponsor sang October 108 gani, mahimo ini nga maggamit sang logo sang event sa pagbaligya sang officially licensed products.
Nagpanindugan naman si Takahashi nga ang kwarta nga nabaton sang kompaniya niya ang bayad para sa isa ka consultancy work.
Si Takahashi nga anay executive sang pinakadako nga advertising agency ang nagserbe nga Tokyo 2020 board humalin sang June 2014.
Na-disband ang Tokyo Olympics organising committee sang nagligad gid lamang nga bulan.
Nagpasalig naman ang anay presidente sang Tokyo 2020 nga si Seiko Hashimoto nga maga-cooperate ini sa imbestigasyon.
