ILOILO CITY – Ginpahayag sang Philippine Basketball Association (PBA) nga maga-set lamang sila sang duha ka conferences sa masunod nga tuig sa Season 48 agud nga masuportahan ang pag-host sang pungsod sa 2023 FIBA World Cup.
Ini ang ginkumpirma ni PBA commissioner Willie Marcial.
Suno sa iya, isa gid lamang ka All-Filipino tournament kag isa man ka import-laced tiff ang magakumpleto sang masunod nga season.
Ang Season 48 ang maga-kick off sa September 2023 pagkatapos na sang World Cup.
Ang mga players sang PBA magluwas lamang sa magahampang sa 2022 PBA Philippine Cup Finals ang mahimo nga mapilian sang Samahang Basketbol ng Pilipinas nga mangin kabahin sang team sa fourth window sang World Cup Qualifiers.
Ang Pilipinas ang yara sa ika-apat nga pwesto sa Group E kun sa diin kabahin diri ang New Zealand, Lebanon, kag Jordan.
Atubangon nila ang 2022 FIBA Asia Cup finalist nga Lebanon sa Agosto 25 kag sa Agosto 29 ang Saudi Arabia diri sa Pilipinas.
Magluwas sa pungsod, mangin host man sang World Cup ang Japan kag Indonesia.
