ILOILO CITY – Sa labing una nga tion, nagpangayo sang pasaylo ang aktor nga si Will Smith matapos nga gintampa si Chris Rock sa 2022 Academy Awards.
Apat ka bulang ang nagligad, nag-share sang video si Will kun sa diin, nagapangayo ini sang pasaylo kay Chris kag nagpahayag nga yara lamang siya sa tion nga gusto ni Chris nga makig-istorya.
Suno kay Will, nagpakig-angut siya kay Chris apang indi ini handa nga makig-istorya sa iya.
Gin-ako sini nga indi mabaton ang iya nangin paminatasan.
Ginpahayag man sini nga wala siya nagpangayo sang pasaylo kay Chris sa iya acceptance speech sa Oscars bangud nga wala siya sa iya kaugalingon.
Tuyo man niya nga magpangayo sang pasaylo sa iloy ni Chris kag sa pamilya sini ilabi na kay Tony Rock nga manghud ni Chris.
Suno sa iya, wala niya ginpanumdom ang mahimo nga nasakitan sang iya nangin akto.
Kung madumduman, sang Marso 27, antes ang pagdaog sang Best Actor, nagpadulong sa center stage si Will kag gintampa si Chris samtang nga naka-live matapos ang issue sa paglahog ni Chris sa sitwasyon ni Jada Pinkett Smith nga iya asawa.
Bangud sang amo nga hitabo, gin-ban si Will sa pagtambong sa Academy sa sulod sang pulo ka tuig.
