ILOILO CITY – Gin-utod na ni unbeaten Filipino boxer Dave Apolinario ang boxing world title drought sang pungsod.
Ini matapos nga ginlutos sang Philippine Doberman ang 3-division former world champion nga si Gideon Buthelezi pinaagi sa isa ka first-round knockout sa ginpatigayon nga IBO world flyweight crown match sa East London, South Africa.
Natumba ang South African boxer pinaagi sa isa ka crushing left straight-right hook combo ni Apolinario.
Nagtinguha pa nga magtindog si Buthelezi apang wala na naka-agwanta sa pulo ka isip sang referee.
Mas ginpanami pa ni Apolinario ang iya nga record nga 17-0, with 12 knockouts.
Apisar nga ginakabig nga less-regarded title, ang IBO strap ni Apolinario ang labing una nga world boxing title sang pungsod humalin sang nabuy-an ni Mark Magsayo ang iya nga WBC featherweight crown kay Rey Vargas sang Mexico.
