Nakilala na sang otoridad kun sin-o ang may kahimuan sa paghaboy sang ginabanta duha ka sako sang dressed chicken sa irigasyon sa Barangay Balabag, Pavia, Iloilo.
Sa interview sang Bombo Radyo kay Engineer Jolepe Suerte, head sang Pavia Municipal Environment and Natural Resources Office (MENRO), iya ginpahayag nga nag-ako mismo si Alias Toto, residente man sang amo nga barangay, nga siya ang naghal-id sang mga manok.
Ginapahayag nga distributor sang dressed chicken si Alias Toto.
Sa inisyal nga impormasyon nga nakuha sang MENRO, may instruction kanday Alias Toto nga ipang-lubong ang mga manok, apang posible nga nagadali ang natungdan rason nga ginpanghal-id na lang ini sa irigasyon.
Ginahibalo pa sang MENRO kun ngaa ginpalubong ang mga manok — kun expired na, ukon kun may iban pa nga ginkonsiderar nga mga rason.
Magapatawag man sang technical conference ang opisina agud mapahangop sa violator ang nalapas sini nga ordinansa.
Sa lebel sang barangay, ginapahayag nga may nalapas man nga barangay ordinance si Alias Toto kun sa diin clean-up activity ang iya himuon kasunod sang first offense.
Ginpahayag sang MENRO nga padayon ang ila nga imbestigasyon batok sa amo nga isyu.
Ini ang una nga tion nga may na-report sa MENRO nga may nagpanghaboy sang amo kadamo nga dressed chicken sa amo nga banwa.
