Magapatigayon sang imbestigasyon ‘in aid of legislation’ ang Iloilo City Council natuhoy sa “euthanasia” ukon “mercy killing” nga ginpatigayon sa pila ka mga ido sa Barangay Navais, Mandurriao, Iloilo City.
Sa interview sang Bombo Radyo kay Iloilo City Councilor Plaridel Nava, iya ginpahayag nga magaduso siya sang ordinansa sa masunod nga session nga maga-ammend sa City Dog Pound Ordinance sa syudad.
Suno kay Nava, maga-imbitar ini sang mga stakeholders agud pamatian ang ila bahin sa pagtapna sa pagduging sang mga layaw nga ido.
Ginpahayag sang konsehal nga luyag sini nga maathagan sa pahayag ni Iloilo City Veterinarian Dr. Tomas Forteza nga ginpatigayon ang “euthanasia” ukon “mercy killing” sa rason nga may “rabies emergency” kag ginapasulabi ang ”public health.”
Ini apisar nga naghingyo lang si Punong Barangay Jayjay Mercado nga dakpon lang ang mga ido.
Samtang, imbestigaran man suno kay Nava kun bala may paglapas sa Republic Act No. 8485 ukon The Animal Welfare Act of 1998 ang nasambit nga mga opisyal.
Sa subong, pahayag ni Nava, nagakapadapat nga magpangibabaw ang safety sang publiko kadungan man sang paghatag sang insakto nga pagtatap sa mga kasapatan.
