JARO, ILOILO CITY – Ginapadalman pa sang Iloilo City Police Office (ICPO) ang motibo sa natabo nga pagpangluthang sa birthday party sa Tacas, Jaro, Iloilo City sa diin anom ang pilason lakip na ang duha ka engineer.
Ang mga biktima amo sanday:
-Mark Louie Ringor, senior engineer kag residente sang Manila
-Jessen Deaño, engineer, residente sang Brgy. Palaciawan, Btac. Nuevo, Iloilo,
-Antonio Gasis, mason kag residente sang Btac. Nuevo, Iloilo,
-Edgar Castor, foreman kag residente sang Baldoza, La Paz, Iloilo City
-Ace Jerald Locsin, foreman kag residente sang Baldoza, La Paz, Iloilo City kag
-Jonel John Alemaña,
Nahibaluan nga samtang naga-inom ang mga biktima agud saulugon ang birthday ni Engr. Ringor sa parking area sang ila ginarentahan nga apartment, may duha ka mga suspek nga nakasakay sa motorsiklo nga nagpondo kag kag ginluthang sang makapila ka beses ang mga biktima.
Si Ringor ang may pilas sa nawala nga paa kag likod, pilas sa natuo nga likod naman ang naangkon ni Deano, pilas sa natuod nga abaga ang naangkon ni Alemania, may pilas naman sa natuo nga kamot kag natuo nga mata si Gasis, pilas sa nalikod ang kay Castor kag pilas sa nawala nga tuhod ang naangkon ni Locsin.
Gilayon naman nga nagpalagyo ang mga suspek matapos ang pagpangluthang kag gindala naman sa ospital ang mga biktima.
Sa interview sang Bombo Radyo kay ICPO Director Police Col. Leo Batiles, iya ginpahayag nga ginahibalo pa nila kun bala may kaangtanan ang insidente sa trabaho sang mga biktima.
Nahibaluan nga ang duha ka mga engineer kag ang iya mga tinawo nga napilasan ang nagatrabaho sa construction sa Salas Real – ACM Homes sa Quintin Salas St, Jaro, Iloilo City.
Suno kay Batiles, posible man nga may personal nga nakaaway ang mga biktima.
Gindala naman suno sa natungdan sa Jaro Police Station ang anom ka mga witness kag ginpangayuan sang statement kaangot sa insidente.
Apang suno kay Batiles, nagtuad ang mga witnesses nga wala sang nakaaway ang duha ka mga engineer kag iban pa nila ka mga tinawo.
