Agud ma-address ang krisis sa kalamay sa Pilipinas, naghingyo ang major producers kay President Ferdinand ‘Bongbong’ Marcos nga itigana na lang para sa local ukon domestic sale ang kalamay nga amo pa ang gina-allocate agud i-export sa Estados Unidos.
Ang Central Azucarera de Bais Inc. (CAB) kag Central Azucarera de San Antonio Inc. (Casa) sa Negros Island ang may yara sang combined volume nga 9,679 metric tons (MT) nga outstanding class A raw sugar.
Ini ang gina-request nila sa Sugar Regulatory Administration (SRA) agud ma-reclassify kag matuon sa class B stocks agud mahimo nga mabaligya sa local market.
Sa ila sulat kay President Marcos nga amo man ang Agriculture Secretary, nag-apelar ang CAB kag Casa agud nga mabaliskad ang ginapahayag “unreasonable, arbitrary and discriminatory” denial sang SRA sa ila aplikasyon para sa sugar reclassification.
Ginsaad man sang major producers nga ang SRA gani mismo ang naghambal nga may yara sang “severe” shortage sang kalamay kag posible nga maubusan gid sang suplay ang pungsod subong nga bulan sang Agosto.
Ginhingyo man sang Negros-based companies nga tun-an liwat ang mandatory sugar export system sa Pilipinas.
Ginsaad man ang 2021 policy discussion paper sang National Economic and Development Authority (Neda) kun sa diin ginpahayag nga: “the allocation of quedans for sugar exports to the US has outlived its usefulness and introduces unwanted distortions in the market.” ##
