ILOILO CITY – Nagapanawagan ang Iloilo Provincial Government sa mga Persons with Disability (PWDs) nga nagabaton sila sa gihapon sang mga aplikante para sa scholarship.
Sa interview sang Bombo Radyo kay Ann Rapunzel “Rara” Ganzon, Development Management Officer II kag spokesperson sang Provincial Social Welfare and Development Office (PSWDO), iya ginpahayag nga gin-extend pa nila ang deadline tubtob sa Agosto 15 para sa gusto nga mag-avail sang educational assistance.
Suno kay Ganzon, ang target sang probinsya amo nga makatipon sang tag-walo ka mga PWD scholars sa tagsa ka mga distrito.
Dugang pa niya, oportunidad na ini para sa mga PWDs nga mag-avail sang scholarship program nagikan sa provincial government.
Agud nga mangin kwalipikado, ang PWD ang nagakadapat nga residente sang probinsya sang Iloilo, rehistrado nga PWD sa ila banwa kag naga-eskwela sa kolehiyo ukon state colleges ukon universities sa probinsya kag may general weighted average nga indi magnubo sa 80 percent para sa Senior High School nga makita sa school card ukon sa pinakaulihi nga semester kag ang pamilya ang may annual income nga indi magsobra sa P150,000.
Sa pagpadulong sa opisina sang PSWDO, yari ang mga dokumento nga dapat dal-on:
● application form nga may isa (1) ka 2×2 recent photo
● photocopy sang PWD ID Card
● certification nagikan sa MSWDO bilang registered PWD
● social case study nagikan sa MSWDO
● certificate of residency nagikan sa punong barangay
● photocopy sang present registration form
● certification nagikan sa eskwelahan nga nagapamatuod nga wala nadala sa Tertiary Education Subsidy (TES) sang CHED ukon sang iban nga scholarship ukon grants
Yari naman ang mga benepisyo nga makuha:
● P3,500 monthly allowance
● P2,000 book allowance per semester
● P2,000 communication allowance per school year
● P2,500 research/thesis allowance
● cash incentive para sa mga graduates kag may honorable distinctions
● total nga P41,000 per school year
Mahimo nga makuha ang application form sa mga masunod:
● Office of Provincial Social Welfare and Development Office, 2nd Floor, Iloilo Provincial Capitol
● Office of Student Affairs (OSA) of West Visayas State University, Iloilo Science and Technology University, kag Northern Iloilo State University
● PWD Focal Person of the City/Municipal Social Welfare and Development Office
● ukon mag-downloaded nagikan sa link (https://bit.ly/38RxJcD) nga ginhatag sang PSWDO
Ang mga requirements ang mahimo nga mapasa personally sa opisina sang PSWDO ukon sa mag-email sa pwd.ipg@gmail.com.
Sa subong, may yara na sang existing nga 159 Indigenous Peoples scholars kag 82 ka PWD scholars.
