ILOILO CITY – Mahimo nga mabilanggo sang anum ka bulan tubtob pito ka tuig ang makalapas sang Data Privacy Act ukon mahimo man nga magbayad sang PhP100,000 tubtob sa PhP5,000,000.
Ang Data Privacy Act ukon ang Republic Act No. 10173 ang isa ka layi nga nagahatag sang proteksyon sa tanan nga sahi sang impormasyon, pribado man ukon personal ukon sensitibo.
Sa interview sang Bombo Radyo kay Atty. Lady Hope Gallenero, Bombo abogado, sa idalom sang Section 3 sang Data Privacy Act, ang personal information amo ang impormasyon nga na-record sa isa ka material form ukon wala, kun sa diin ang identity sang isa ka indibidwal ang makita ukon ang masigurado sang entity nga nagakapot sang impormasyon, ukon ang impormasyon ang gintingub nga makatudlo kag makakumpirma sang identity sang isa ka indibidwal.
Ang ini nga layi ang naga-cover sang natural kag juridical persons nga kabahin sang pag-proseso sang impormasyon.
Ang natural person amo ang isa ka indibidwal samtang ang juridical person naman amo ang kompaniya ukon institusyon.
Ini ang naga-cover man sang tanan nga nagagamit sang equipment nga nahamtang sa Pilipinas ukon ang may yara sang opisina, branch ukon ahensya sa pungsod.
Ang Data Privacy Act ang may yara sang duha ka interes– maproteksyunan ang kinamatarong sang data subject kag mapasigurado nga yara sa gihapon ang free flow sang impormasyon agud nga ma-promote ang growth sang ekonomiya kag sosyodad.
Kung ma-obserbaran, sa tagsa ka paghatag sang impormasyon, may yara sang data privacy notices nga nagahingyo anay sang pahanugot halin sa data subject.
