Ginalantaw sang Iloilo City Police Office (ICPO) nga posible mga bilin pa sang nagliligad nga drug groups ang mga gina-alegar durugista nga nagapangsulod-sulod na liwat sa duha ka mga barangay sa syudad sang Iloilo.
Matandaan nga naghimo sang resolutions ang Barangay Bakhaw sa Mandurriao kag Tanza Esperanza sa Iloilo City Proper agud mag-request sang police deployment sa ila tagsa ka mga lugar bangud sa ginapahayag mga pangayaw nga nagasulod ilabi na kun kagab-ihon nga ginapatihan may transaksyon sa iligal nga droga.
Ini nga mga barangay ang lunsay may daan nga rekord sa iligal nga droga sang nagliligad nga tuig.
Ang Tanza Esperanza amo anay ang lugar sang alleged Western Visayas drug lord nga si Melvin Odicta, samtang ang Bakhaw naman ang lugar sang isa pa ka ginapahayag drug lord nga si Richard Prevendido.
Sa interview sang Bombo Radyo kay Pol. Col. Leo Batiles, director sang ICPO, iya ginpahayag nga sandig sa reports nga nabaton sang talatapan, may daan na nga rekord ini nga mga durugista kag nagabalik lang sa ila nga opisyo.
Ang numero uno nga rason nga ginalantaw sang ICPO amo nga posible nagapahapos ini nga mga tawo bangud nakit-an nga madasig ang kuwarta kun may iligal nga droga.
Sa Bakhaw, Mandurriao, may 22 ka police personnel nga gin-padala, samtang sa Tanza Esperanza, may yara sang 21 ka mga pulis agud magbulig bantay sa entrance kag exit sa barangay kag may yara man sang assigned nga magpatrolya. ##
