ILOILO CITY – Nagapadayon ang pagpakig-istorya sang Samahang Basketbol ng Pilipinas (SBP) sa availability sang young Filipino center nga si Kai Sotto agud nga maghampang sa Gilas Pilipinas para sa FIBA Basketball World Cup 2023.
Una na nga ginkumpirma sang SBP nga magahampang ang Fil-Am NBA star nga si Jordan Clarkson.
Suno kay SBP executive director kag spokesperson Sonny Barrios, gusto man ni Sotto nga maghampang sa Gilas kag nagalaum sila nga magpasugot ini.
Nahibaluan nga si Sotto ang nagbalik sa Adelaide 36ers sa National Basketball League sang Australia matapos nga wala napilian sa NBA Rookie Draft.
Gin-ako ni Barrios nga kinahanglan sang Gilas Pilipinas si Sotto sa World Cup sa masunod nga tuig.
Sa subong, ang kumpirmado nga mangin kabahin sang Gilas Pilipinas amo sanday Clarkson, Dwight Ramos, Kiefer Ravena, Thirdy Ravena, Bobby Ray Parks, Francis Lopez, Carl Tamayo, kag Kevin Quiambao.
