Napatay na sa edad nga 57-anyos ang Filipino athletics legend nga si Lydia De Vega ukon ang kilalala anay bilang Asia’s fastest woman.
Ginbawian sang kabuhi ang nasambit nga sports icon sa Makati Medical Center. Ginahulat pa nga i-anunsyo ang dugang nga detalye sa haya kag lubong ni Lydia, sprinter nga tumandok gid sang Meycauayan, Bulacan.
Matandaan nga sang nagligad nga Hulyo 20, ginsapubliko sang anak ni Lydia nga si Stephanie nga naga-suprer ang iya iloy sang Stage 4 breast cancer kag yara na sa kritikal nga kondisyon.
Isa siya sa most decorated Filipino athletes sa maragtas sang Pilipinas nga naghakot sang mga medalya sa nagkalain-lain nga hinampang: siyam ka gold medals sa Southeast Asian Games, kag duha ka gold medals sa Asian Games.
Sa Asian Athletics Championships, duha ka beses niya nga nadag-an ang 100 kag 200 meter golds — natabo sang 1983 kag 1987.
Sang 1980s, ginkabig siya nga Asia’s fastest woman bangud sa pagpanguna sa 100-meter dash events sa 1982 kag 1986 Asian Games.
Gintiglawas man niya ang Pilipinas sang 1984 kag 1988 Olympics.
Nag-retiro ang nasambit nga Filipino sports icon sa pag-intra sa mga kumpetisyon sang 1994.
Gin-uyatan niya ang 100-meter kag 200-meter run nga national records sa masobra tatlo ka dekada.
Ang iya 11.28 record nga na-set sa 1987 Southeast Asian Games ang naguba paagi sa Filipino-American sprinter nga si Kristina Knott nga naka-record sang 11.27 seconds sa women’s 100-meter dash sa 2020 Drake Blue Oval Showcase sa Iowa sang 2020.
Naka-serbe man si De Vega bilang councilor sang Meycauayan sa Bulacan province.
Sang 2005, gin-appoint siya bilang liaison officer sang Alliance of Coaches and Athletes of the Philippines sa Philippine Sports Commission.
Sang Disyembre 2005, nagpadulong si De Vega sa Singapore bangud sa tatlo ka job offers sa Singaporean private schools nga maghandle sang athletics.
Natabo ang katapusan nga public appearance ni De Vega sang 2019 sang nangin isa sa iya sa flag bearers sang Pilipinas sa opening ceremony sang 30th Southeast Asian Games nga ginpatigayon sa Philippine Arena.
Kaupod niya sang amo nga tion ang iban pa nga Pinoy sports legends kaangay kanday Efren “Bata” Reyes, Paeng Nepomuceno, kag Eric Buhain. ##
