Ginbasura ni President Ferdinand “Bongbong” Marcos, Jr. ang proposal nga mag-import sang dugang nga 300,000 metric tons sang kalamay.
Ginkumpirma ini sang Malacañang kasunod sang order nga ginpaguwa sang Sugar Regulatory Administration (SRA) may kaangtanan sa import program para sa crop year 2021-2022.
Nakit-an sa amo nga order nga may pirma na sa ibabaw sang pangalan ni Marcos bilang SRA Board Chairperson kag Agriculture Secretary, apang suno kay Press Secretary Trixie Cruz-Angeles, indi ini matuod nga pirma sang presidente.
Kun ikumparar ang pirma sa Sugar Order No. 4 sa nagligad nga issuance, nagaguwa nga ginpirmahan lang ang dokumento on behalf sang Presidente. Ginkwestyon kun si Agriculture Undersecretary Leocadio Sebastian ang nagpirma sa amo nga dokumento bangud siya anay ang gin-designar sang presidente nga alternate sa SRA board.
Wala pa sang sabat ang SRA kag ang DA sa amo nga mga pamangkot kasunod sang pagpanginwala sang Malacañang.
Indi na subong available ang dokumento sa website sang SRA.
Ginahulat man subong ang paathag sang Malacañang kun ngaa gin-reject sang presidente ang amo nga proposal.
KAUNDAN SANG ORDER NO. 4
Nakasaad sa amo nga order nga indi dapat maglapaw sa 300,000 metric tons sang volume sang kalamay nga dapat i-import sang Pilipinas.
Ginsaad man nga as of July 31, yara sa 1,792,102 metric tons ang actual production sang raw sugar samtang 737,254 metric tons naman ang actual production sang refined sugar, mas manubo sang 16.18% kag 2.84% ipaanggid sa produksyon sang nagligad nga tuig.
Ginalantaw sang SRA nga magadangat sa 1.8 million metric tons ang raw sugar production sa crop year 2021-2022, mas manubo sang 16% halin sa produksyon nga 2,143,018 metric tons sang nagligad nga season.
Ginpahayag nga ginpaguwa ang amo nga order agud nga ma-address ang current sugar supply situation kag ang nagataas nga presyo sa merkado.
Antes pa man gin-isyu ang amo nga order, ginpahayag na ni SRA Administrator Hermenegildo Serafica nga ginalantaw ang pag-import sang 300,000 metric tons sang kalamay bangud sa kakulangan sa suplay. Una na nga ginlantaw nga posible iga-import ang kalamay gikan sa Thailand, Vietnam, Malaysia, kag Indonesia.##
