ILOILO CITY – Indi makapasakop sa US Open ang anay Serbian world number one nga si Novak Djokovic bangud nga indi ini mahimo nga magpadulong sa New York para sa tournament bangud nga nagapabilin ini nga indi bakunado batuk sa COVID-19.
Sa subong, ang mga travelers ang gina-require nga magpakita sang pamatuod nga bakunado sa pagsulod sa Estados Unidos.
Sa tweet ni Djokovic, ginkasubo niya nga indi siya makahampang sa US Open kag magahulat na gid lamang sang opurtunidad nga maka-compete sa liwat.
Una na nga ginpahayag sang Serbian player nga nakahanda siya nga indi makapasakop sa Grand Slam tournaments bangud nga ang mga players ang kinahanglan nga bakunado.
Si Djokovic ang yara sa entry list para sa tournament sa New York sa Agosto 29 tubtob sa Septyembre 11.
