ILOILO CITY – Wala pa nakabaton sang memorandum ang Commission on Higher Education (CHED) -VI nagikan sa ila central office may kaangtanan sa indi na pag-require sang Covid-19 vaccination sa mga estudyante kag personnel nga magatambong sa face-to-face classes sa mga kolehiyo kag unibersidad.
Sa interview sang Bombo Radyo kay Dr. Raul Alvarez, director sang CHED VI, iya ginpahayag nga apisar pa wala pa sang memorandum, executory man ang amo nga pronouncement.
Suno kay Dr. Alvarez, gina abi-abi gid nila ang ini nga pronouncement bangud nga kun basehan ang vaccination rate sang mga manunudlo kag estudyante sa Western Visayas, tuman ka dako sang deperensya kun ikumpara sa national average nga gindeklarar sang CHED.
Sa national average, 90 percent sa mga manunudlo ang bakunado na apang sa regional rate, yara na sa 93 percent.
Sa mga estudyante naman, 77 percent ang national average samtang ang regional average ang nagdangat sa 87 percent.
May kaangtanan sa pagbukas sang mga higher education institutions, ginabilin na sang CHED sa ila ang pag-desisyon kun san-o sila magabukas kag kun magapatuman na sang full in-person classes.
Sa subong, nagdangat na sa 170 ka mga eskwelahan ang nagbukas kag ginalauman nga makumpleto na ini sa ikaduha nga semana sang bulan sang Septyembre.
