ILOILO CITY – Nagpaandam ang chairman sang senate committee on tourism nga si Senator Nancy Binay may kaangtanan sa pag-host sang Pilipinas sa 2023 FIBA World Cup.
Suno kay Senator Binay, kinahanglan nga malikawan ang “national embarrassment” sa pag-host sang Pilipinas sa tuman ka dako nga sporting event.
Ang Pilipinas upod sa Japan kag Indonesia ang maga-host sang basketball tilt nga maga-umpisa sa Agosto 25 tubtob sa Septyembre 10 sa masunod nga tuig.
Suno kay Binay, kinahanglan sang gobyerno nga magtukod sang isa ka inter-agency council agud nga masuportahan ang tikang sang mga pribado nga sektor kag mapasiguro nga malikawan sang pungsod ang bisan ano nga kapalpakan.
Suno pa sa iya, ini ang isa ka maayo nga oportunidad agud nga mapakita nga ang Pilipinas ang nagbalik na sa tourism map.
Ang indi maayo nga pagplano ang magaresulta sang dako nga kahuy-anan ilabi na nga ang FIBA amo ang pinakadako nga international tournament.
Ginpanugyanan naman niya ang Department of Tourism (DOT) nga magpakig-angut sa private sector agud nga masiguro nga wala sang problema sa pag-host sang pungsod sa amo nga tournament.
