Balik sa presuhan ang isa ka tricycle driver matapos nakuhaan sang ginabanta P13,600 nga balor sang iligal nga droga sa drug buy bust nga ginpatigayon sa Barangay El 98, Jaro, Iloilo City.
Ang nadakpan amo si Luther Jaleco, 64, residente sang Brgy. Desamparados, Jaro, kag ginakabig nga isa ka high value target.
Sa interview sang Bombo Radyo kay Plt. Marlon Perez, team leader sang City Drug Enforcement Unit, iya ginpahayag nga nabaklan si Jaleco sang suspected illegal drugs sa balor nga P1,100.
Sa dugang nga pagpangusisa, nakuhaan man ini dugang sang 25 tanan ka sachet sa suspected illegal drugs.
Suno kay Perez, nakaagi na dakop sa drug buy-bust operation ang arestado sang tuig 2018 kag naka-guwa sang tuig 2019.
Naglawig man sang tatlo ka bulan ang monitoring sang mga pulis antes ini nadakpan.
