ILOILO CITY – Nagdangat na sa lima ang nagkalamatay sa probinsya sang Iloilo bangud sang rabies.
Sa data sang Iloilo Provincial Health Office, as of September 10, ang lima ka mga nagkalamatay ang ginabug-usan sang duha halin sa Balasan, isa sa Cabatuan, isa sa Estancia kag isa man sa Lambunao.
Ini ang mas manubo sa record sang nagligad nga tuig nga naglab-ot sa walo.
Ang kabilugan nga kaso sang rabies sa probinsya ang nagdangat sa 79 kun sa diin, ang may pinakamadamo amo ang banwa sang Igbaras nga may dose, ginasundan sang Oton kag Santa Barbara nga may tag-anum, Cabatuan nga may lima, Dueñas kag Alimodian nga may tag-apat kag Miag-ao, Leon, San Miguel, Ajuy, kag San Enrique nga may tag tatlo ka kaso.
Sa interview sang Bombo Radyo kay Dr. Maria Socorro Colmenares-Quiñon, pinuno sang Iloilo Provincial Health Office, iya ginpahayag nga ang numero sang mga nagkalamatay ang makabig na nga alarming.
Ini apisar nga may yara sang mga animal bite centers nga accessible sa tanan nga district hospitals kag health offices.
Suno pa sa iya, sa Septyembre 28 kuntani, saulogon ang World Rabies Day nga may tema nga ‘One health, zero deaths’ apang ang probinsya ang may yara na sang lima ka napatay.
Dugang pa niya, ang kamatayon bangud sang rabies ang matapna gid kuntani kun magkadto lang sa mga animal bite centers ang mga pasyente kag magpabakuna ilabi na kay libre lamang ang treatment.
Nagpanawagan man ini sa mga tag-iya sang ido nga mangin responsable kag indi pagpabay-an nga nagalagaw lang ang mga ini.
