ILOILO CITY – Apisar sa nagataas nga kaso sang acute gastroenteritis kag cholera sa pila ka bahin sang Western Visayas, indi sa gihapon prayoridad ang pagbakuna.
Sa interview sang Bombo Radyo kay Dr. Adriano Suba-an, director sang Department of Health Region 6, iya ginpahayag nga ang ginatutukan subong amo ang pagbakuna batuk sa coronavirus disease 2019.
Apang nagalaum naman ang ahensya nga may yara sang cholera vaccination program sa labing madali nga panahon.
Ang Department of Health Region 6 ang nagahatag sang technical assistance sa local governments pinaagi sa Regional Epidemiology and Surveillance Unit pinaagi sa pagpadala sang collected specimen para sa testing sa cholera confirmation.
Dugang pa niya, gin-tap man ang mga stakeholders sa may kaangtanan sa tubig kag ginpahanumdom sang mga butang nga dapat nga himuon lakip na ang water refilling stations kag water laboratories.
Ginapanugyanan man ang mga local government units nga mag-activate sang tagsa ka local health drinking quality monitoring committees.
May ginhatag man nga logistics sa local government units pareho sang Iloilo City nga ginalakipan sang fluids, Oral Rehydration Solutions (ORESOLs), kag antibiotics humalin sang nagsugod ang pagtimbuok sang kaso pinaagi sa City Health Office.
