ILOILO CITY – Katuyuan sang Iloilo Provincial Government nga masolusyonan ang problema sa sektor sang agrikultura pinaagi sa pagselebrar sang labing una nga Provincial Farmers’ Week nga nag-umpisa kahapon nga adlaw kag magatakup sa Oktubre 7, 2022.
Si Iloilo Governor Arthur Defensor, Jr. amo ang nagpanguna sa pagbukas sang selebrasyon sa Iloilo Provincial Capitol lobby.
Ang selebrasyon ang may tema nga “Mangunguma padayon nga edukaron, hugpungon kag pabaskugon para agrikultura mangin mainuswagon.”
Suno sa gobernador, ang ini nga aktibidad ang oportunidad nga mahibaluan ang problema sa farming kag fisheries kag makahimo sang polisa kag masolusyonan ini.
Sa pag-address sang sini nga mga problema, pahayag sang gobernador, indi lamang ang Provincial Agiculture’s Office ang magahimo sang tikang kundi sa bulig man sang iban pa gid nga mga departamento sa kapitolyo.
Pila sa mga kinahanglan nga ma-address amo ang gap sa tunga sang bulk produce kag business industry.
Sa interview naman sang Bombo Radyo kay Mr. Ildefonso Toledo, provincial agriculturist, ang selebrasyon nga ini ang nagahatag sang pagkilala kag dungog para sa mga mangunguma nga mahatagan pa gid sila sang igtalupangod.
Ang mga aktibidad nga kabahin sang amo nga programa ang ginalakipan sang launching sang week-long Agri-Fishery Trade Expo 2022 kag forum sa farm mechanization kag solar irrigation projects nga may tinutuyo nga mapasangkaron pa ang ihibalo kag abilidad sang mga mangunguma.
May yara man sang lecture demo sa flower arrangement, lecture sa landscaping kag demo contest sa dish garden nga patigayunon subong nga adlaw.
Bwas nga adlaw, Oktubre 5, may yara sang coastal cleanup sa banwa sang Oton kag lecture kag pahampang sa fish conversation sa pili nga mga estudyante sa amo nga banwa.
May yara man sang lecture sa aquaculture kag postharvest value adding sa Casa Real de Iloilo.
Sa amo man nga adlaw, ang Provincial Rural Improvement Club Achievement Day sa Iloilo Sports Complex.
May yara man patigayunon nga pagpangkapon sang mga ido kag kuring sa Casa Real Front Lobby kag seminar orientation sa livestock production technologies sa National Museum – Western Visayas.
Ang highlight sang selebrasyon amo ang Farmers’ Congress sa Iloilo Sports Complex sa October 7 kun sa diin, ang mga mangunguma, mga kababainhan, mga pamatan-on, manugpangisda ang kilalahon sa ila bulig sa agricultural kag fishery productivity.
Ang 1st Provincial Farmers’ Week ang ginaselebrar pinaagi sa Provincial Ordinance 2018-190 nga gin-sponsor ni first district Board Member Valentin Serag nga nagadeklarar sang una nga semana sang Oktubre bilang Farmers’ Week sa probinsya sang Iloilo.
