ILOILO CITY – Indi kuntento si Police Regional Office Director Police Brigadier General Leo Francisco sa imbestigasyon sang Special Investigation Task Group PALIBOSFER (Parohinog, Libao, Bosque, Fernandez).
Sa interview sang Bombo Radyo kay Police Brigadier General Francisco, iya ginpahayag nga mahinay nga dalagan sang imbestigasyon sang task group.
Sa masunod nga semana, masukat na sa isa ka bulan ang natabo nga krimen apang tubtob subong, wala pa nakakuha ang 30-member task group sang pahayag sang pamilya sang mga biktima.
Suno sa director, basic lamang ina nga proseso sang imbestigasyon kag dapat nga matapos na tatlo tubtob apat ka adlaw pagkatapos sang krimen.
Apang sa naobserbahan sang director, nabudlayan ang task group.
Nahibaluan nga personal nga nagpadulong si Police Brigadier General Francisco sa Estancia agud hibaluon ang status sang imbestigasyon.
Una na nga ginpahayag ni PSMS Francisco Lindero Jr., spokesperson sang Iloilo Police Provincial Office kag designated spokesperson sang task group nga nagahulat pa sila sang sabat sang National Bureau of Investigation may kaangtanan sa ila ginpadala nga sulat.
