ILOILO CITY – Wala pa sang may nabaton nga guidelines ang Department of Health Region VI may kaangtanan sa gin-anunsiyo sang central office nga coronavirus disease benefits para sa healthcare kag non-healthcare workers.
Una na nga ginpahayag sang Department of Budget and Management nga gin-aprubahan na ang pagpagwa sang ginabanta PHP11.5 billion para sa distribution sang One Covid-19 Allowance ukon Health Emergency Allowance para sa masobra sa 1.6 million nga kwalipikado nga mga benepisyaryo.
Suno sa ahensya, ang pondo ang magakadto sa Department of Health nga amo ang ahensya nga in charge sa paghatag sang One Covid-19 Allowance para sa mga eligible nga public kag private healthcare workers kag subong man, mga non-healthcare workers.
Ini ang maga-cover sang wala napondohan nga One Covid-19 Allowance claims para sa period nga January tubtob June 2022 nga porsyon sang unfunded nga 2,613,331 approved claims as of September 5, 2022 nga may total funding requirement nga P18.7 billion.
Sa interview sang Bombo Radyo kay Arnold Celestino, chief administrative officer sang Department of Health Region VI, announcement pa lamang ang ila nga nabaton kag ginahulat pa ang guidelines nagikan sa central office agud nga mahibaluan nila kung ano ang coverage sang amo nga budget.
Suno sa natungdan, masobra sa duha ka libo nga mga benefeciaries ang nakakumpleto na sang requirements kag nagahulat na gid lamang sang budget.
Nagpanugyan si Celestino nga magapagwa sila sang advisory sa tion nga mabaton na nila ang guidelines.
