ILOILO CITY – Indi lang isa kundi tatlo ang nangin rason ni Police Regional Office VI Director Police Brigadier General Leo Francisco sa pagkakas sa hepe sang Estancia Municipal Police Station nga si Police Lieutenant Joebert Amado.
Kahapon, nagpadulong ang director sa Estancia agud nga hibaluon ang dalagan sang imbestigasyon sang Special Investigation Task Group PALIBOSFER.
Sa interview sang Bombo Radyo kay Police Brigadier General Francisco, iya ginpahayag nga sa iya pag-abot, nakita niya nga mahigko ang istasyon sang Estancia Municipal Police Station.
Indi pa ma-account ni Amado ang iya nga personnel suno sa director.
Dugang pa niya, sang ginpangayu-an ini sang update sa dalagan sang imbestigasyon sa natabo nga shooting incident sa Barangay Villa Panian sa amo nga banwa, wala nakahibalo si Amado bangud yara sa task group ang tanan nga papeles.
Didto pa sa headquarters sang Iloilo Police Provincial Office nagpadulong ang director agud nga magpangayo sang update.
Suno sa director, sang Septyembre 23 pa ang katapusan nga paghatag sa iya sang update sang task group.
Bangud sini, gilayon niya nga ginkakas sa pwesto si Amado kag iga-assign sa regional headquarters.
Mahimo sa gihapon nga magbulig si Amado sa imbestigasyon sang task group suno sa opisyal nga ginbaton man ni Amado.
Si Amado ang tal-usan ni Police Lieutenant Arnel Buraga.
Nahibaluan nga una na nga ginpahayag ni Francisco nga indi siya kuntento bangud mahinay ang dalagan sang imbestigasyon sang Special Investigation Task Group PALIBOSFER.
