ILOILO CITY – Madamo sa gihapon ang mga proyekto sa probinsya sang Iloilo nga wala natapos ukon delay ang pag-ubra.
Ini ang nadiskubrehan sang Committee on Infrastructure sa Sangguniang Panlalawigan base sa ginpasa nga report sang Iloilo Provincial Engineering Office.
Sa interview sang Bombo Radyo kay Iloilo 4th District Board Member Rolando Distura, chairman sang amo nga komitiba, ginpahayag sini nga pila sa mga rason sang atrasado nga mga proyekto amo ang malain nga tyempo, indi available nga equipment kag kakulang sang materyales kaangay sang aggregates.
Dugang pa niya, nagarason pa ang iban nga contractor nga atrasado man ang bayad sa ila.
Apang suno kay Distura, mahapos lamang ang pagpagwa sang budget kun kumpleto na ang dokumento sang contractor.
Bangud sini, tawgon ang atensyon sang Iloilo Provincial Engineering Office agud nga mapatadlong sa mga contractor ang ila nga trabaho.
