Epektibo na subong nga adlaw, Oktubre 11, ang big-time nga oil price hike pagkatapos sang sunod-sunod nga semana sang senintimos nga rollback.
Ang gasolina ang magasaka sang P1.20 sa kada litro samtang ang diesel ang magasaka sang P6.85 sa kada litro.
Ang kerosene naman ang magasaka sa P3.50 sa kada litro.
Ginpaathag ni Department of Energy director Rino Abad nga may saka sa presyo sang produktong -petrolyo bangud sa pagsugot sang Organization of Petroleum Exporting Countries and its allies nga buhinan ang output sang two million barrels kada adlaw.
Ini ang pinakadaku nga production cut halin sang nag-umpisa ang Covid-19 pandemic.
Nagapanghakroy naman ang transport groups bangud sa isa lang ka saka sa presyo sang gatong, ginapahayag nga daw napanas ang tanan nga benepisyo nga nahatag sang bag-o lang ginpatuman nga fare increase.
May pila na ka transport groups nga naga-arrange sang schedule agud makaistorya kay Department of Transportation Secretary Jaime Bautista agud mangayo sang bulig kaangay sang pagpadayon sang service contracting, fuel subsidy ukon discounts, ukon ang renewal sang hagna nga nagapatuman sang automatic fare adjustment formula.
Una naman nga ginpahayag sang Land Transportation Franchising and Regulatory Board nga wala na sang ginalantaw nga pagsaka sa minimum fare sa masunod nga mga binulan antes magtakop ang 2022.
