ILOILO CITY – Istrikto nga ginachekyar sa mga border control points ang papeles sang mga naga-transport sang baboy sa mga lugar nga yara sa gwa sang 1 kilometer-radius nagikan sa ground zero sa banwa sang Oton.
Sa interview sang Bombo Radyo kay Dr. Darel Tabuada, Iloilo Provincial Veterinary Officer, iya ginpahayag nga wala sang problema ang paghulag sang baboy kag mga by-products sini sa iban nga banwa apang, dapat nga magpakita sang nagaka-igo nga dokumento nga nagapamatuod nga legal ang pagdala sang baboy.
Samtang, padayon pa ang imbestigasyon sa rason sang pagkalamatay sang mga baboy sa banwa sang Oton.
Madamo sang nagasulod nga impormasyon halin sa palibot apang wala pa sang nagakaigo nga kumpirmasyon.
Sa subong, nalimpyuhan na ang 0.5 kilometer-radius kag gin-extend sa 1 kiometer radius ang quarantine control point.
Halos isa na ka semana ang nakaligad sang ginpaidalom sa examination ang blood sample sang mga baboy sa banwa sang Oton apang tubtob subong, wala sa gihapon sang resulta nga ginpagwa sa publiko.
Suno kay Tabuada, may yara na sang resulta apang ang Department of Agriculture gid lamang ang otorisado nga makapagwa sini.
