Duha ka separado nga kaso ang posible atubangon sang isa ka 47-anyos nga lalaki nga gina-alegar nagsakit kag nagtaya sang armas sa iya 15-anyos nga nobya sa Dueñas, Iloilo.
Detained subong ang ginatumod nga lalaki sa police station kag ginahulat sang mga pulis ang desisyon sang pamilya sang biktima kun i-file ang kaso nga paglapas sa Republic Act 9262 ukon Violation against Women and their Children.
Magluwas diri, ginhanda man ang dokumento sa kaso nga Illegal Possession of Firearms.
Sa interview sang Bombo Radyo kay Police Staff Sergeant Jowenes Amparan, imbestigador sang Women and Children’s Protection Desk sa Dueñas Municipal Police Station, iya ginpahayag nga nagreklamo ang biktima nga gin-tayaan ini sang armas sang iya nga nobyo, gintampa, ginbutong ang buhok, kag ginbunggo sa pader.
Gina-alegar nga sa balay mismo sang biktima natabo ang pagsakit kag naabtan pa mismo sang pulis nga nagaaway pa ang duha.
Sang nag-abot na ang pulis, boluntaryo man nga nag-surrender ang lalaki kag ginsungka man sini ang iya nga .22 caliber revolver.
Sa inisyal nga imbestigasyon sang otoridad, ginapahayag nahimo sang lalaki ang pagsakit sa biktima bangud sa sobra nga kaakig bangud ginapahayag nag-disco ang iya 15-anyos nga nobya.
