ILOILO CITY – Indi na kinahanglan nga mag-apelar ang Iloilo Provincial government sa mga local government units nga nag-ban sang live hogs kag by-products sini nagikan sa probinsya.
Nahibaluan nga pagkatapos sang pagdeklarar nga may yara sang suspected case sang African swine fever sa banwa sang Oton, sunud-sunod na ang pagpagwa sang mandu sang pila ka mga lugar sa Visayas nga nagadumili na sa pagbaton sang baboy nagikan sa Iloilo.
Sa interview sang Bombo Radyo kay Iloilo Governor Arthur Defensor, Jr., iya ginpahayag nga base sa eksperyensya, ang naga-ban sang baboy halin sa probinsya ang wala man nagabakal diri.
Suno pa sa gobernador, ang mga lugar nga ini amo pa ang ginakuhaan sang suplay sang pila ka mga manugbaligya sang baboy sa probinsya.
Ginpasalig naman sang gobernador nga bastante sa gihapon ang suplay sang baboy kag padayon sa gihapon ang paghulag sa mga banwa magluwas gid lamang sa mga lugar nga sakop pa sang 1 kilometer-radius nagikan sa ground zero.
Natalana naman nga magasapol ang gobernador sa mga local government units.
Sa ginpagwa nga executive order sang gobernador, ginkumpirmar sini nga nagpositibo sa African swine fever ang swine specimen samples gikan sa Barangay Bita Norte, Oton.
Apang tubtob subong, wala sa gihapon nakapagwa sang kumpirmasyon ang Department of Agriculture.
