ILOILO CITY – Ginkumpirmar sang Iloilo Provincial Government nga madugay na nga may yara sang African swine fever sa banwa sang Oton.
Sa interview sang Bombo Radyo kay Dr. Darel Tabuada, head sang Iloilo Provincial Veterinary Office, iya ginpahayag nga base sa ginpatigayon nga imbestigasyon, sang bulan sang Septyembre, na-record ang una nga kaso sa Barangay Sta. Monica.
Buot silingon, ang kaso sang African swine fever sa Barangay Bita Norte ang indi makabig nga “index case.”
Suno kay Dr. Tabuada, madamo sang nagkalamatay nga baboy didto apang wala na-report gani wala napaidalom sa laboratory examination.
Nahibaluan ini sa ginpatigayon nga imbestigasyon sa komunidad upod ang Bureau of Animal Industry.
Samtang, nagdangat na sa ginabanta 15 ka mga barangay ang apektado sang African swine fever kag ginalauman nga magasaka pa.
Nagdangat naman sa 518 tanan nga mga baboy ang gin-depopulate nagikan sa sini nga mga barangay.
