Posible nga gin-utod-utod ang lawas sang mga biktima nga nasapwan na nga kalabera sa sulod sang sako kag ginhal-id sa Barangay Tranghawan, Lambunao, Iloilo.
Sa interview sang Bombo Radyo kay Gaudioso Pangantigon, force multiplier sa lugar nga nagbulig sa otoridad sa pagkuha sang mga kalabera, iya ginpahayag nga napa-igo sa dako nga sako ang lawas sang mga biktima nga posible nga gin-utod-utod anay.
Suno pa sa iya, posible nga babayi ang isa sa ila bangud sang nakita nga buhok.
Ang sako nga ginsudlan ang gabuk na nga nagapamatuod man nga posible nga binulan na ang nakaligad sang ginbilin ang lawas sang tatlo.
May nakita pa nga face mask kag duct tape sa isa sa mga sako.
Samtang, sang nagligad nga mga semana, may yara sang napanimahuan nga indi maayo nga baho sa amo nga lugar.
Nahibaluan nga nakita sang mga nagapangayam ang tatlo ka sako nga ginhaboy sa pil-as sa kilid sang dalan.
