ILOILO CITY – Ginapatuman ang ‘monitor-surveillance-test and destroy’ sa mga banwa sa probinsya sang Iloilo nga may positibo nga kaso sang African swine fever.
Sa interview sang Bombo Radyo kay Iloilo Governor Arthur Defensor, Jr. iya ginpahayag nga ginapaidalom sa test ang tanan nga may sintomas sang virus kag sa tion nga magpositibo, gilayon nga ginapatay kag ginalubong.
Sa tion naman nga magnegatibo, mahimo nga ma-ihaw ang baboy kag makunsumo.
Apang, ginklaro ni Defensor nga dapat dira lang kan-on ukon kunsumuhon sa banwa nga ginpaidalom sa red zone.
Sa probinsya sang Iloilo, ang banwa sang San Miguel kag Oton ang sa karon yara sa red zone status bangud sang kumpirmado nga kaso sang African swine fever.
