ILOILO CITY – Ginpagwa na sang Department of the Interior and Local Government ang listahan sang mga awardees sang 2022 Seal of Good Local Governance sa bug-os nga pungsod.
Lakip sa mga awardees ang Iloilo Province, Iloilo City, Passi City kag mga banwa sang Anilao, Bingawan, Concepcion, Dingle, Oton, Pavia, kag Zarraga.
Sa bahin sang Zarraga, Iloilo, ginkalipay sang alkalde ang liwat nga pagkalakip sang banwa sa amo nga pagpasidungog.
Sa interview sang Bombo Radyo kay Mayor Joefel Soldevilla, iya ginpahayag nga nagapakita lamang ini nga ginapadalagan sang husto ang banwa kag nagasunod sa regulasyon sang Department of the Interior and Local Government.
Dugang pa niya, ang banwa ang nagapakamalaot gid sa ano man nga sahi sang drug activities kag gindeklarar na nga drug-cleared.
Suno pa kay Soldevilla, dapat man nga naga-umwad ang ekonomiya nga nagahatag sang job opportunities sa mga pumuluyo.
