ILOILO CITY – Napasakaan na sang kaso ang na-dismiss nga pulis nga nadakpan sa drug buy-bust operation sa Barangay San Andres, San Rafael, Iloilo.
Ang anay pulis amo si Reybert Abawa, 48, kag residente sang nasambit nga lugar.
Si Abawa ang nabaklan sang iligal nga droga nga nagabalor sang P500 apang nakuha dugang sa iya ang 10 ka sachet sang ginapatihan shabu nga may estimated drug price nga P81,600.
Sa interview sang Bombo Radyo kay Police Lieutenant Johnny Oro, hepe sang San Rafael Municipal Police Station, iya ginpahayag nga masobra man sa duha ka semana nga ginpaidalom sa surveillance ang amo nga anay pulis.
Ginakuha ni Abawa ang droga diri lang sa probinsya sang Iloilo.
Makabig naman ini nga high value individual bangud isa siya ka anay pulis.
Suno kay Oro, 2016 sang na-dismiss sa serbisyo si Abawa bangud nga nagpositibo ini sa random drug test nga ginpatigayon sang siya ang katapo pa sang Philippine National Police Aviation Security Group nga naka-base sa Cebu City.
