Ginpaandaman sang FIFA ang Tunisia nga posible ini nga makakas gikan sa World Cup 2022 kun mapamatud-an nga nagapahilabot ang Tunisian goverment sa ila nga football organization.
Ginpadala sang FIFA ang sulat sa Tunisian Football Federation subong nga semana kag ginsaad ang concern kun sa diin partikular nga gin-mensyonar ang pahayag sang Youth and Sports Minister sang Tunisia nga si Kamel Deguiche.
Kasunod ini sang komento ni Deguiche kaangot sa pagdula sang federal bureaux nga nagalakip man sang football federation.
Nagapati ang FIFA nga nagatuyo si Deguiche nga magpahilabot kun paano ginapadalagan ang football federation sang Tunisia.
Sa idalom sang pagsulundan sang FIFA, ang federations sang tanan nga member nations ang dapat nga mangin hilway sa third-party ukon sa anuman nga government involvement.
Kun indi mabaton sang FIFA ang kinahanglanon sini nga paathag gikan sa mga ginbuy-an nga komento ni Deguiche, daku ang tyansa nga ma-ban ang Tunisia sa 2022 World Cup nga maga-umpisa na sa Nobyembre 20.
Nahibaluan nga na-ban na ang Kenya kag ang Zimbabwe bangud sa paglapas sang nasambit nga pagsulundan sang FIFA. Nasuspinder man anay sang Agusto ang India bangud sa amo man nga rason.
Ini na ang ika-anum nga tion nga qualified ang Tunisia sa World Cup. Kaupod sini sa Group D ang reigning world champion nga France, ang Australia, kag ang Denmark.
Sa maragtas sang World Cup, wala nakalampuwas ang Tunisia sa group stages.
Pananglitan makakas ang Tunisia sa World Cup sa Qatar, lakip sa ginabati-bati nga magabulos amo ang Italya nga amo ang highest-ranked nation nga indi kuwalipikado sa Qatar. Apang kun Italya ang ibutang sa Group D, buot silingon sini, tatlo na ang myembro sang Union of European Football Associations sa group stage kag indi ini pwede.
May mga pahayag man nga pagabuslan ini sang isa pa ka African member association (CAF). Ang Nigeria amo ang highest-ranked Confederation Africaine de Football member nga wala naka-qualify sa World Cup subong nga tuig.
Posible man nga ang Mali ang magabulos sa Tunisia bangud sila ang nalutos sang Tunisia, 1-0, sa ila nga World Cup qualifier subong nga tuig. ##
