ILOILO CITY – Nagsapol na ang local government unit sang Alimodian, Iloilo antes pa man nagwa ang positibo nga resulta sang laboratory examination sa blood sample sa mga baboy sa Barangay Buhay, Alimodian, Iloilo, nakapatigayon na sang depopulation.
Sa interview sang Bombo Radyo kay Mayor Ian Kenneth Alfeche, iya ginpahayag nga ginkabig na nga red zone ang yara sa sulod sang 500-meter radius halin sa infected area samtang ang yara sa sulod sang 1-kilometer ang ginpaidalom sa pink (buffer) zone.
Nagdangat sa 21 tanan ka mga baboy ang ginlubong sa amo nga piggery nga malayo sa barangay proper.
Suno pa sa alkalde, indi pa mahibaluan kun sa diin posible nakuha ang balatian.
Nagpanawagan naman ang alkalde sa tanan nga mga hog raisers sa banwa nga sa tion nga may yara sang baboy nga nagabatyag sang sintomas sang African swine fever, gilayon nga mag-report sa Municipal Agriculturist Office kag mag-request sang testing sa Provincial Veterinary Office.
Nagpanugyan man ini nga indi mag-panic bangud nga na-contain na ang kaso.
Nagpasalig man si Alfeche nga handa gid nga magbulig ang banwa sa mga apektado.
