Para sa iban nga tawo, indi man big deal ang pagsakay sa eroplano magluwas lang abi kun first time mo ini.
Apang lain ang eksperyensya ilabi na kun ikaw ang ginabansagan pinakamataas nga babayi sa bilog nga kalibutan!
Ang naga-uyat sini nga rekord amo ang 25-anyos nga Turkish woman nga si Rumeysa Gelgi nga nagataas sang 7 feet kag 0.7 inches.
Ini ang una nga bes nga nakasakay si Ms. Gelgi sa eroplano. 13 ka oras ini nga flight halin sa Istanbul, Turkey padulong sa San Francisco, United States.
Agud masiguro nga matawhay ang flight para kay Ms. Gelgi, temporaryo nga gin-kuha sang airline ang anum ka economy seats kag gin-convert sa isa ka special stretcher.
Suno kay Ms. Gelgi, nangin matawhay man ang iya nga flight kag ginpasalamatan sini ang crew sang eroplano.
“This was my first plane ride but it certainly won’t be my last,” pahayag ni Gelgi.
Suno sa Guinnes World Record, si Miss Gelgi man ang nagauyat sang rekord nga may longest finger sa living person, longest hands, kag longest back.
Ang daw indi mapatihan nga kataason ni Ms. Gelgi ang tuga sang kondisyon nga ginatawag nga Weaver syndrome. Ini nga rare genetic condition ang rason sang accelerated growth kag talalupangdon nga advanced bone age. Bangud sini ugaling, limitado man ang hulag sang joints kag mabudlay man ang paglakat kag mangin ang pagginhawa kag ang pagtulon.
Bangud sa iya nga kondisyon, nagagamit si Ms. Gelgi sang wheelchair ukon walker agud nga makalibot-libot kag makabyahe.
Naga-trabaho si Ms. Gelgi sa technology sector kag magatinir ini sa US sa sulod sang anum ka bulan para makakita sang dugang nga opportunities sa iya nga karera.
