ILOILO CITY – May presensya sang E. Coli kag Coliform bacteria ang ice nga gingamit sa pagtimpla sang buko pandan juice nga gin-inom sang mga estudyante sang Pili National High School sa Ajuy, Iloilo.
Patay sa amo nga infection ang isa ka estudyante kag tatlo sa gihapon ang yara sa ospital.
Sa interview sang Bombo Radyo kay Dr. Rodney Labis, head sang Health Service Delivery Division sang Iloilo Provincial Health Office, iya ginpahayag nga sa ginpatigayon nga investigation, ang source sang food poisoning amo ang buko pandan juice nga amo ang common nga gin-inom sang 45 tanan nga mga biktima.
Base sa ginpatigayon nga laboratory examination sa ospital kag sang Rural Health Unit sang Ajuy, 25 diri ang nagpositibo sa amoeba nga lunsay gid nag-inom sang buko juice.
Sa ginpatigayon nga water testing sa ginbaklan sang ice kag tubig nga gingamit sa pagtimpla sang amo nga ilimnon, nakita nga kontaminado ini kag indi safe nga imnon.
Kun balik-balikan, aga sang Nobyembre 4 sang ginpatigayon ang United Nations Celebration.
Pagkatapos sadto, nagkaon ang mga estudyante upod ang ila manunudlo.
Naka-eksperyensya sila sang vomiting kag diarrhea.
Sang Domingo, Nobyembre 6, nagpadayon ang ginbatyag nga sintomas sang mga estudyante kag naglala ang ila nga sitwasyon.
Gilayon sila nga ginpangdala sa nagkalain-lain nga ospital sa norte kag isa ang napatay.
