Nagapangatubang sang panumbungon nga physical injury sa San Juan City Prosecutor’s Office si John Anthony Amores sang JRU Heavy Bombers matapos ini nanumbag sang duha ka players sa matchup sang iya team sa College of St. Benilde Blazers.
Ang nagpasaka sang reklamo amo sanday Frederick James Pasturan kag Taine Mitchell Davis.
May black eye pa si Pasturan, samtang sa sag-ang naman ang igu ni Davis nga naga-ekperyensya pa sang pagkahilo matapos ang insidente.
Suno kay Atty. Aldwin Salumbides, abogado sang Blazers, kaso kriminal ang ginaatubang ni Amores kag indi dapat pagpa-buyan-buyanan lang.
Nag-file naman sang affidavit bilang witness ang coach sang Blazers nga si Chris Tiu.
Ginkondena naman ni San Juan City Mayor Francis Zamora ang insidente sang pagpanumbag nga natabo sa sulod sang FilOil EcoOil Centre sa amo nga syudad.
