Sa Pennsylvania sa Estados Unidos, sa nagapadayon subong nga midterm elections, daog ang isa ka state lawmaker sa eleksyon apisar nga napatay na ini sang nagligad nga bulan bangud sa cancer.
Sa preliminary results, indi lang siya daog, kundi landslide nga sahi sang pagdaog.
Ang ginatumod nga politician amo si Tony DeLuca, isa ka Democrat nga state lawmaker sang Pittsburgh suburb sa House, nga napatay bangud sang lymphoma sang October 9 sa edad nga 85.
Sang amo nga tion, ulihi na agud nga makakas pa ang iya nga pangalan sa balota bangud nagahilapit na ang nationwide US legislative elections.
Napabilin ni Deluca ang iya nga pwesto bangud sa 86 percent sang votes nga nakuha out of 98 percent sang ballots nga naisip na.
Bangud sini, kinahanglan ang espesyal nga eleksyon agud madesisyunan kun sin-o ang magapungko sa pwesto.
Nagpahayag man ang Pennsylvania Democratic Party nga bisan nasubuan ang partido nga wala na si Representative Tony DeLuca, proud man sila sa gihapon sa desisyon sang mga botante kag sa pagpili sa Democratic values paagi sa pag-eleher liwat kay De Luca sa pwesto.
