ILOILO CITY – Padayon ang pagpamatay sang mga baboy nga yara sa 0.5 kilometers tubtob sa 1 kilometer-radius nagikan sa mga infected area sa probinsya sang Iloilo bilang tikang agud nga wala na sang mangin host ang African swine fever.
Sa data sang Iloilo Provincial Government, may yara na sang 1, 365 ka mga baboy ang ginpatay sa mga banwa nga may yara sang kaso sang amo nga balatian.
Nagdangat sa 47 ka mga barangay ang apektado kag 156 naman ang mga hog raisers.
May yara man sang ginahulat nga pending result kag posible nga madugangan pa ang mga lugar nga apektado.
Sa interview sang Bombo Radyo kay Iloilo Governor Arthur Defensor, Jr., iya ginpahayag nga ang pagpamatay sang baboy ang ginapatigayon agud nga matinlu-an ang lugar kag liwat nga makapadamo sang baboy.
Gina-enganyo naman sang gobernador ang mga banwa nga yara sa pink zone category nga magpatigayon sang pork festival.
Ini ang may katuyu-an nga maubos ang mga baboy sa lugar agud nga makapadamo naman liwat.
Ang banwa sang Tigbauan ang nakapatigayon na sang ila pinakauna nga Lechon Avenue.
