ILOILO CITY – Ginlubong na lamang sang mga pumuluyo sang Barangay San Pedro, Jaro, Iloilo City ang nasampay nga baboy sa suba nagikan sa wala nahibaluan nga lugar.
Sa interview sang Bombo Radyo kay Punong Barangay Lita Jover, iya ginpahayag nga ginabanta 60-80 ang kilo sang baboy nga nakita sa suba kag yara na sa advanced state of composition.
Kaina sang aga, ginpaguyod nalang sa mga pumuluyo sa lugar ang amo nga baboy kag ginpalubong.
Suno pa kay Jover, indi iya sang pumuluyo sang barangay ang baboy kag ginasuspetsahan nga ginhaboy kag ginpa-anod lamang sa suba.
Nahibaluan nga indi ini ang una nga tion nga may yara sang baboy nga nakita sa suba sa syudad sang Iloilo.
Sa Barangay Calubihan, may yara man sang mga baboy nga naputos sa sako ang nakita sa creek.
