ILOILO CITY – Ginkalipay sang pamunuan sang Police Regional Office VI ang pagpasaka na sang kaso sang Special Investigation Task Group PALIBOSFER batuk sa lima ka mga suspek kag anum ka mga John Does sa kamatayon sang tatlo ka mag-abyan sa Barangay Villa Panian, Estancia sang Septyembre 14.
Three counts sang kaso nga murder ang ginpasaka batok kay Jevron Parohinog, ang nagaisanon nga survivor sa amo nga insidente.
Ang iban pa nga mga suspek nga ginpangalanan amo sanday Jix Parohinog y Dela Rosa, Michael Porras, Michael Quiatchon y Alfante kag Benzen Llamado.
Sa interview sang Bombo Radyo kay Police Brigadier General Leo Francisco, direktor sang Police Regional Office VI, iya ginpahayag nga ang pagpasaka sang kaso ang resulta sang kabudlay sang task group.
Nadugayan suno sa iya ang pagpasaka sang kaso bangud sa pag-ilis sang commader sang Task Group PALIBOSFER.
Ang una nga nagpamuno sa task group amo si anay Iloilo Police Provincial Office director Police Colonel Adrian Acollador apang sang nagligad nga bulan, gin-relieve siya bilang IPPO director.
Sunod nga nagpungko bilang IPPO director si Police Colonel Noel C. Aliño nga amo naman ang nagbulos nga head sang task group.
Ginpasalig man ni Francisco nga nag-agi sa maayo nga proseso ang pagpasaka sang kaso.
Sa motibo sang krimen, nagpamalibad si Francisco nga maghatag sang detalye bangud nga napasaka na ang kaso kag ang importante, nahibalu-an sang pumuluyo.
Matandaan nga una na nga ginpahayag sang task group nga ang tatlo ka mga anggulo nga ginalantaw motibo sang krimen amo ang robbery, hatred kag business interest.
