ENGLAND VS. IRAN (GROUP B)
Ginkamasaan sang England ang Iran, 6-2, sa opening Group B match sa FIFA World Cup 2022 sa Khalifa International Stadium sa Qatar.
Ang una nga nag-score sang goal para sa England amo ang 19-anyos nga si Jude Bellingham sa ika-35 nga minuto sang hampang. Ini ang una nga na-deliver ni Bellingham nga goal para sa pungsod kag una niya ini nga ginhimo sa World Cup stage.
Ang ikaduha nga goal ang nagikan kay Bukayo Saka sa 43rd minute. Kaangay ni Bellingham, ang tuig 2022 amo man ang World Cup debut ni Saka.
Ginsundan ni Raheem Sterling ang goal sa ika-45 nga minuto sang match.
Sa second half naman, nag-goal liwat si Saka apang tatlo ka minutos ang nakaligad, nakabawi ang Iran sa ika-65 nga minuto paagi sa goal halin sa Iranian star nga si Mehdi Taremi.
Wala nagpasugot ang England kag nagbawi liwat paagi kanday Marcus Rashford nga amo ang naghatag sang Goal Number 5 kag si Jack Grealish nga amo ang nagdul-ong sang Goal Number 6.
Sa katapusan nga minuto sang hampang, may foul nga natabo kag nagkadto ang penalty spot sa Iran. Nangin duha ang goals sang Iran matapos ang penalty kick nga halin gihapon kay Mehdi Taremi.
Talalupangdon naman nga wala naka-score ang team captain sang England nga si Harry Kane nga isa ka former Golden Boot award-winner kag top scorer sa 2018 World Cup.
US VS. WALES (GROUP B)
Nagtapos sa 1-1 draw ang opening group B match sang team sang Estados Unidos sa 2022 World Cup matapos naka-score ang Wales sa late penalty kick.
Ang una nga goal sang US team ang natabo sa 36th minute paagi kay Timothy Weah, apang natupungan sang team captain sang Wales nga si Gareth Bale nga amo ang nag-score para sa Wales paagi sa penalty kick sa ika- 82 nga minuto.
NETHERLANDS VS. SENEGAL (GROUP A)
Daog ang Netherlands batok sa ila opening game batok sa Senegal, 2-0.
Natapos ang first half sang hampang nga wala gid sang naka-score sa duha ka team.
Pag-umpisa sang second half, ginpasa-pasa sang Netherlands ang bola samtang nagahulat naman ang Senegal sa defensive side sang pitch.
Una nga naka-sore si Philips Sport Vereniging striker Cody Gakpo sa ika-53 nga minuto sang hampang paagi sa pag-assist sang midfielder sang Barcelona nga si Frankie de Jong.
Sa katapusan nga minuto naman, nag-score ang midfielder nga si Davy Klaassen sang isa pa kag amo na ang katapusan nga goal sa hampang.
ECUADOR VS. QATAR (GROUP A)
Ginlutos sang Ecuador ang host nation nga Qatar, 2-0, sa opening match sang 2022 FIFA World Cup sa Al Bayt Stadium.
Ang duha ka goal sang Ecuador ang lunsay nagikan sa 33-anyos nga team captain nga si Enner Valencia nga amo ang all-time top scorer sang pungsod.
Natigayon ini nga duha ka goals sa first half sang hampang: una, paagi sa penalty kick sa ika-15 nga minuto bangud sa foul sang Qatar keeper nga si Saad Al Sheeb.
Ini ang labing-una nga tion sa World Cup history kun sa diin ang opening goal sa single edition sang tournament ang na-score pinaagi sa penalty spot.
Ang ikaduha naman nga goal ni Valencia amo ang 31st-minute header nga naghatag sang lead sa Ecuador.
Antes sini, may yara na kuntani sang goal halin kay Valencia sa ikatatlo nga minuto pa lang sang hampang apang gin-disallow kasunod sang ‘Video Assistant Referee’ review bangud sa marginal offside.
Kun halimbawa wala gin-disallow ang una nga goal ni Valencia sa ika-tres minutos sang hampang, ini kuntani ang kabigon nga pinakadasig nga World Cup goal sa opening match.
