Ginhatagan sang hayo nga “Little Nugget” ang isa ka baby girl matapos nga ginbun-ag ini sang iya iloy sa bathroom sang isa ka fast food restaurant.
Suno sa panugiron sang iloy nga si Alandria Worthy nga taga-Atlanta, Georgia, nabatyagan niya nga nagasakit na ang iya nga tiyan rason nga nagkadto na sila sang iya nga fianc sa ospital sang aga sang amo nga adlaw.
Apang nagpundo anay sila sa isa ka popular nga fast food restaurant, bangud maggamit kuntani sang comfort room si Alandria.
Apang sang ara na sa comfort room, gulpi lang kuno nga naglupok ang iya panubigon.
Nagsinggit si Alandria kag madasig man nga nag-responde ang manager nga si Tunisia Woodward.
Nakit-an na sini si Alandria nga nagakaya-kaya sa toilet floor, kag gets na dayon sini kun ano ang masunod nga matabo.
Ang natabo… mismo ang manager ang nagpabata kay Alandria sa bulig sang duha ka ka workers samtang naga-assist man ang fiance.
Ginapahayag tatlo lang ka push, kag 15 ka minutos lang ang kadugayon, kag naguwa na ang cutie baby girl nga si Nandi Ariyah Moremi Phillips nga automatic nga ginhatagan sang nickname nga Nugget.
Nagapati naman ang first-time mom kag ang iya fiance nga divine intervention ang nagtulod sa ila nga maghapit anay sa fast food restaurant agud nga mabuligan sila sang tatlo ka mga babayi nga naga-trabaho sa amo nga kalan-an.
Nag-award naman ang franchise owner sang tag-$250 ukon malapit tag-P15,000 nga gift cards sa mga empleyado bangud sa maayo nga hinimuan sang amo nga adlaw.
