Nahisugtan nga pabayaron na lang ang mga bar-goers nga nagtuga sang mga halit sa nightlife hotspot sa San Rafael Mandurriao, Iloilo City kaina sang kaagahon.
Sa interview sang Bombo Radyo kay Police Major Ray Sumagaysay, hepe sang Mandurriao Police Station, iya ginpahayag nga nagsugtanay ang mga tag-iya sang kiosko kag establisyemento nga bayaran na lang sang mga lalaki ang mga halit sa lamesa, bangko, kag iban pa sa amo nga lugar
Nagsugtanay man nga wala na sang ipasaka nga kaso batok sa mga na-involve sa pagpanggamo.
Suno kay Sumagaysay, hinubog ang ginhalinan sang amo nga away.
Sa separado nga interviews sang Bombo Radyo, may mga nagpahayag nga hinali lang nga may naglampusanay sang bangko kag nagtinapungulay apang wala mahibaluan kun paano kag sin-o ang nag -umpisa sang gamo.
May video man kun sa diin nakit-an ang pagtambag sang mga bouncers kag sang mga katapo sang Mandurriao Police Station sa mga indibidwal nga involved sa inaway.
Samtang nga nagailinaway ang mga lalaki, nakit-an man ang mga bar-goers nga todo sa paghinugyaw nga todo pa sa pag-enjoy sa ila nga nasaksihan.
Samtang, kasunod sang insidente, gilayon nga ipatawag ni Iloilo City Mayor Jerry Trenas ang mga establishments nga involved.
Nagpaandam naman ini sa tagdumalahan sa mga establisyemento nga posibe ipasirado ang mga ini kun indi sila makasarang mag-kontrol sang ila customer.
Sa interview sang Bombo Radyo sa alkalde, iya ginpahayag nga kun amo sini ang nagakatabo, posible nga ibalik gid ang daan nga executive order nga tubtub lang 12:00 sa kaagahon ang pag-serbe sang makahulubog nga ilimnon.
Sa video clips nga gina-uyatan sang Bombo Radyo, may nakit-an man nga bouncers nga nag-intra sa kinagamo.
Ginbalikan sang alkalde ang natabo sa isa ka super club nga temporaryo man nga ginpasirado sa Mandurriao bangud sa mga reklamo batok sa bouncers.
Gintugutan lang nga magbukas ang amo nga establisyemento bangud sa ila ginplastar nga mga protocol kag kasunod sang rekomendasyon sang Business Permits and Licensing Office. ##
