Ginkamasaan sang World Number 1 kag five-time champions nga Brazil ang South Korea, 4-1, sa knockout stage sa World Cup 2022.
Ang naka-skor para sa Brazil amo sanday: Vini Jr sa 7th minute, penalty kick ni Neymar sa 13th minute, Richarlison sa 29th minute, kag Lucas Paqueta sa 36th minute — lunsay sa first half.
Apisar nakahibalo ang South Korea nga heavy underdog ini sa hampang, wala man ini nagpasugot nga matapos ang hampang nga indi maka-goal. Ang naka-skor para sa Asian team amo si Paik Seoung-ho sa 76th minute sang match.
Sa pagselebrar sang ila nga kadalag-an, gin-uyatan man sang Brazilian players ang banner nga may nawong kag pangalan ni Pele, isa sa ginakabig greatest players of all time.
Naka-admit subong ang 82-anyos nga Brazilian soccer great sa Sao Paulo hospital agud nga i-reevaluate ang iya nga cancer treatment.
Balantayan ang sunod nga hampang sang Brazil batok sa Croatia sa quarterfinals.
