ILOILO CITY – Wala ginadula sang Balasan Municipal Police Station ang posibilidad nga “inside job” ang natabo nga pagpang-ransack sa isa ka mall sa Barangay Manhut, Balasan, Iloilo.
Sa interview sang Bombo Radyo kay Police Lieutenant Alexander Lauron, hepe sang Balasan Municipal Police Station, iya ginpahayag nga makatilingalahan nga wala gid sang may nakabati sang gahud samtang nga ginamaso sang mga wala pa nakilala nga suspek ang semento nga pader nga amo ang gin-agyan sa pagsulod sa department store.
Antes ang pagmaso sa semento, ginguba pa sang mga suspek ang cyclone wire sa likod nga bahin sang mall kag ginguba man ang padlock sa metal door.
Sang nakasulod na, ginguba sang mga suspek ang vault sa isa ka jewelry store kun sa diin nakatago ang alahas nga nagabalor sang P5 million kag gindala pa sa atubang sang isa ka eyewear store.
Ginkuha man sang mga suspek ang mga cellphone nga nagabalor sang P292,000.
Imbitaron man sang kapulisan ang tatlo ka mga security guards nga naka-duty sang amo nga gab-i.
Lakip man sa imbitaron sang kapulisan para sa imbestigasyon amo ang mga construction workers nga naka-agi trabaho sa sulod sang mall sa panggab-i nga shift.
Maga-request naman sang kopya sang closed circuit television footages ang kapulisan sa mga kaingod nga establishments bangud nga wala naga-andar ang iya sang mall.
